Os grandes proxectos nacen dos pequenos descubrimentos do día a día. Esta semana, a aparición dunha araña de gran tamaño na aula espertou a curiosidade dos nenos e nenas e converteuse no punto de partida dunha pequena investigación. Observamos as súas patas, descubrimos cantos ollos tiña e achegámonos aos detalles do seu corpo a través do microscopio, das imaxes e dos libros informativos. Un achado inesperado que deu lugar a novas preguntas, conversas e moitas ganas de descubrir.
Partindo deste interese xurdido de maneira espontánea, propuxemos un taller de arte no que as arañeiras se converteron nas protagonistas. Unha proposta que, ademais de dar continuidade ás investigacións da aula, nos permite achegarnos ao Samaín, ás tradicións propias e aos elementos da natureza que nos acompañan nesta época do ano.
O taller desenvolveuse en dúas partes. Na primeira, cada neno e nena puido crear a súa propia tea de araña sobre papel, empregando fío e cola. A través da manipulación dos materiais, da experimentación coas liñas e das decisións sobre como construír a súa composición, puxéronse en xogo a creatividade, a coordinación óculo-manual, a psicomotricidade fina e diferentes habilidades manuais. Como en todo taller artístico, o proceso tivo tanto valor coma o resultado: cada creación foi única, respectando os ritmos, as ideas e as posibilidades de cada pequeno artista.
Na segunda parte, a proposta medrou e transformouse nunha creación colectiva: tecer unha arañeira xigante entre todos e todas. A través do traballo en equipo, da cooperación e da coordinación dos movementos, os fíos foron debuxando unha gran rede que nos permitiu experimentar con outras dimensións, explorar o espazo e descubrir como as achegas individuais poden dar forma a unha creación compartida.
Todo o proceso estivo envolto nun ambiente de calma, acompañado polo xogo coa luz e as sombras, que engadiu unha dimensión sensorial e estética á experiencia. Os fíos, as formas e os efectos luminosos transformaron o espazo e convidáronnos a observar, experimentar e gozar sen présa.
Ningún comentario:
Publicar un comentario