Visita a Casa do Patrón

 Para pechar este curso, realizamos unha excursión moi especial ao Museo Etnográfico Casa do Patrón, en Lalín. Foi unha xornada chea de aprendizaxes, convivencia e diversión, na que puidemos achegarnos ás tradicións e aos costumes da Galicia de antano.

Durante a visita participamos en diferentes obradoiros de arxila, tear e elaboración de pan, nos que tivemos a oportunidade de aprender e experimentar de primeira man algunhas das tarefas e oficios tradicionais.

Ademais, ensináronnos todas as estancias dunha vivenda tradicional galega, descubrindo como vivían as familias, como se organizaban os espazos e que utensilios empregaban no seu día a día anos atràs.

Tamén compartimos un agradable tempo de xantar e de xogo cos nosos compañeiros e compañeiras, gozando dunha xornada de convivencia.

FESTA DA AUGA

A nosa Escola encheuse de risas, xogos e moita unha actividade na que alumnado e familias puideron compartir unha xornada lúdica e refrescante para dar a benvida ao bo tempo.

Ao longo da mañá, realizamos propostas de experimentación, movemento, creatividade e xogo libre. O máis exitoso foi deslizarse polo tobogán de auga pero tamén os disparadores e globos de auga, poñer a proba a súa concentración na zona de pesca e explorar materiais de trasvases, desenvolvendo habilidades motrices e de coordinación.

A creatividade tamén estivo moi presente a través dos batidos de cores, a pintura corporal, a pintura con xeo e moitas experiencias sensoriais que permitiron experimentar con diferentes texturas, temperaturas e formas de expresión artística. Mentres,a proposta de liberar animais do xeo mediante sal achegou aos participantes a un pequeno experimento científico cheo de descubrimentos. O xogo con escuma de afeitar e bloques de construción ou os pomperos, favoreceron a imaxinación, a exploración e a interacción entre iguais. 

Este tipo de xornadas permiten que o xogo libre ocupe un papel protagonista. A través del, os nenos e nenas desenvolven a súa autonomía, creatividade, capacidade para resolver problemas e habilidades sociais, ao tempo que fortalecen vínculos afectivos cos seus compañeiros, compañeiras e familias.

Queremos agradecer a participación e colaboración de todas as familias, que contribuíron a crear un ambiente de convivencia, respecto e alegría. Grazas por compartir connosco unha mañá tan especial. 

 

CONVIVENCIA DEILAN

Vivimos unha fermosa xornada de convivencia entre o alumnado da Escola de Pousada e de Barciela. Aproveitando o bo tempo, desprazámonos ata a praia para compartir unha mañá diferente, chea de compañeirismo, diversión e aprendizaxe ao aire libre.

A actividade comezou cunha pequena ruta a pé e durante o percorrido, conversaron e coñeceron mellor ao alumnado da outra escola.

Unha vez na praia, dedicamos boa parte da mañá ao xogo libre e á exploración do medio natural. O alumnado participou de maneira espontánea en diferentes actividades, observando os elementos naturais, interactuando coa contorna, desfrutamdo cos seres vivos e compartindo momentos. Mentres recollemos o lixo que íamos atopando, contribuíndo ao coidado e conservación deste espazo natural.

O xogo libre ofrece numerosos beneficios para o desenvolvemento infantil, xa que favorece a creatividade, a autonomía, a toma de decisións e as relacións sociais, permitindo que os nenos e nenas aprendan de forma activa a través da experiencia e da interacción co medio.

Aproveitamos tamén para traballar hábitos de saude neste tipo de actividades, alimentación saudable, protector solar… 

A xornada transcorreu nun ambiente moi positivo, marcado polo respecto, a colaboración e as ganas de compartir momentos cos compañeiros e compañeiras de ambas escolas.

Queremos agradecer ás familias a súa colaboración e confianza, que fan posible a realización deste tipo de actividades tan enriquecedoras para o alumnado.

Sen dúbida, foi unha experiencia moi especial que gardaremos con agarimo e que contribúe a fortalecer os lazos entre a Escola de Pousada e Barciela.